na ḳhat likhe na diye un ko taar ab ke baras

guzar ga.ī yuuñ hī saarī bahār ab ke baras

na so.e raat ko jā kar khulī huī chhat par

kiye na ham ne sitāre shumār ab ke baras

guzishta saal bhī dil be-qarār thā lekin

ajiib tarah kī uljhan hai yaar ab ke baras

kisī bhī lab pe tabassum ke gul nahīñ mahke

kisī bhī aañkh se chhalkā na pyaar ab ke baras

ye rañg kyuuñ nahīñ jachte mirī nigāhoñ meñ

ye phuul kyuuñ mujhe lagte haiñ ḳhaar ab ke baras

na jaane kis tarah logoñ ke din guzarte haiñ

kisī ke ruḳh pe nahīñ hai nikhār ab ke baras

karoge kaise 'ḳhalish' apnī be-kalī kā ilaaj

sharāb meñ bhī nahīñ hai ḳhumār ab ke baras