ta.abīr se mahrūm tire ḳhvāb bahut the
saada sī kahānī thī magar baab bahut the
aa lagtī kināre se mirī kashtī-e-jāñ bhī
shāyad ki mire paañv meñ girdāb bahut the
be-nām hue naam kī takrīm ke hāthoñ
pahchāntā kyā koī ki alqāb bahut the
afsos tamavvuj unheñ sāhil pe na laayā
anmol guhar varna tah-e-āb bahut the
har lahza badaltī huī rut bas meñ nahīñ thī
joban pe thī barsāt to shādāb bahut the
kuchh ham bhī bahut se ga.e namnāk havā meñ
kuchh tum bhī to āmāda-e-ī.jāb bahut the
ham apne hī pāband nahīñ the kabhī 'yāsir'
uTh aa.e ki taqrīb ke ādāb bahut the