lage jab pyaas to ristā lahū piine nahīñ detā
udhaḌtā khaal bhī merī mujhe siine nahīñ detā
tamannā maut kī radd ho ga.ī hai vaqt ke Dar se
agar maiñ zindagī māñgūñ mujhe jiine nahīñ detā
ḳhud apnī shakl dekhe ek muddat ho ga.ī mujh ko
uThā letā hai patthar TuuTe ā.īne nahīñ detā
diloñ ko khīñchne vaalā tarannum kho chukā un kā
magar vo mere be-āvāz sāzīne nahīñ detā
zamāna un pe 'yāsir' naag kī mānind baiThā hai
mujhe mere javāhir mere ganjīne nahīñ detā