sirf ik soz to mujh meñ hai magar saaz nahīñ
maiñ faqat dard huuñ jis meñ koī āvāz nahīñ
mujh se jo chāhiye vo dars-e-basīrat liije
maiñ ḳhud āvāz huuñ merī koī āvāz nahīñ
vo maze rabt-e-nihānī ke kahāñ se lā.ūñ
hai nazar mujh pe magar ab ġhalat-andāz nahīñ
phir ye sab shorish-o-hangāma-e-ālam kyā hai
isī parde meñ agar husn-e-junnūñ-sāz nahīñ
ātish-e-jalva-e-mahbūb ne sab phūñk diyā
ab koī parda nahīñ parda-bar-andāz nahīñ