na khule uqdā-hā-e-nāz-o-niyāz

husn bhī raaz aur ishq bhī raaz

raaz kī justujū meñ martā huuñ

aur maiñ ḳhud huuñ ek parda-e-rāz

bāl-o-par meñ magar kahāñ paa.eñ

bū-e-gul yaanī himmat-e-parvāz

sāz-e-dil kyā huā vo TuuTā sā

saarī hastī hai gosh-bar-āvāz

lazzat-e-sajda-hā-e-shauq na pūchh

haa.e vo ittisāl-e-nāz-o-niyāz

dekh rānā.i-e-haqīqat ko

ishq ne bhar diyā hai rañg-e-majāz

sāz-e-hastī kā jā.eza kaisā

taar kyā dekh taar kī āvāz