maanā ki tirī bazm meñ chāñd aa.e hue haiñ
lekin vo tire sāmne gahnā.e hue haiñ
jo ham se na milne kī qasam khaa.e hue haiñ
shāyad vahī aġhyār ke bahkā.e hue haiñ
mahtāb ke hālāt bhī dekheñ to kabhī vo
is husn-e-do-roza pe jo itrā.e hue haiñ
kah do unheñ aa kar mirī jannat meñ vo bas jaa.eñ
jannat se nikāle hue jo aa.e hue haiñ
aa.egī nazar 'rāz' koī kal bhī na sīdhī
sar-tā-ba-qadam aaj vo bal khaa.e hue haiñ