ashk-e-ġham aañkh se bāhar bhī nahīñ aane kā
abr chhaT jaa.eñ vo manzar bhī nahīñ aane kā
ab ke āġhāz-e-safar soch samajh ke karnā
dasht milne kā nahīñ ghar bhī nahīñ aane kā
haa.e kyā ham ne taḌapne kā sila paayā hai
aisā ārām jo aa kar bhī nahīñ aane kā
ahd-e-'ġhālib' se ziyāda hai mire ahd kā karb
ab to kuuze meñ samundar bhī nahīñ aane kā
sabza dīvār pe ug aayā 'zafar' ḳhush ho lo
aage āñkhoñ meñ ye manzar bhī nahīñ aane kā