madrasa yā dair thā yā ka.aba yā but-ḳhāna thā
ham sabhī mehmān the vaañ tū hī sāhab-ḳhāna thā
vaa.e nādānī ki vaqt-e-marg ye sābit huā
ḳhvāb thā jo kuchh ki dekhā jo sunā afsāna thā
haif! kahte haiñ huā gulzār tārāj-e-ḳhizāñ
āshnā apnā bhī vaañ ik sabza-e-begāna thā
ho gayā mehmāñ-sarā-e-kasrat-e-mauhūm aah
vo dil-e-ḳhālī ki terā ḳhaas ḳhalvat-ḳhāna thā
bhuul jā ḳhush rah abas ve sābiaqe mat yaad kar
'dard'! ye mazkūr kyā hai āshnā thā yā na thā