kāñToñ tumheñ phūloñ kī chubhan yaad rahegī
bhūloge ki rūdād-e-chaman yaad rahegī
kyā bhūlne degī vo mujhe rāt-kī-rānī
vo zulf vo ḳhushbu-e-badan yaad rahegī
ye zaḳhm-e-dil-e-zār to bhar jā.egā ik din
lekin tire māthe kī shikan yaad rahegī
thā sāya-fagan jis pe koī fat.h kā parcham
vo laash bhī be gor-o-kafan yaad rahegī
manzil pe maza degī mujhe lazzat-e-manzil
ya.anī mujhe qadmoñ kī thakan yaad rahegī
ye sach hai mujhe daad kī ḳhvāhish nahīñ 'saulat'
nā-qadrī-e-arbāb-e-suḳhan yaad rahegī