aisā hai kaun jo mujhe haq tak rasā.ī de
dekhūñ jise bhī ḳhauf-zada sā dikhā.ī de
apne haiñ shahr bhar meñ parāyā koī nahīñ
phir bhī hamārā dil hai jo tanhā dikhā.ī de
taḳhsīs koī zālim o mazlūm kī nahīñ
koī duhā.ī de bhī to kis kī duhā.ī de
hamdard hoñ ġhayūr hoñ aur pur-ḳhulūs hoñ
ai kārsāz bahnoñ ko ab aise bhaa.ī de
ye zindagī hai apnī kabhī ḳhush kabhī udaas
is kashmakash se mujh ko ḳhudāyā rihā.ī de
'zebī' ajiib daur hai ye vahshatoñ kā daur
saaya bhī apnā maut kā saaya dikhā.ī de