Hosh Tirmizi

laega rang zabt-e-fughan dekhte raho

Hosh Tirmizi

lā.egā rañg zabt-e-fuġhāñ dekhte raho

phūTegī har kalī meñ zabāñ dekhte raho

barpā sar-e-hayāt hai ik hashr-e-dār-o-gīr

detā hai kaun kis ko amaañ dekhte raho

dam-bhar ko āstān-e-tamannā pe hai hujūm

jaa.e bichhaḌ ke kaun kahāñ dekhte raho

milne ko hai ḳhamoshi-e-ahl-e-junūñ daad

uThne ko hai zamīñ se dhuāñ dekhte raho

mahfil meñ un sham.a jalī hai ki jān-o-dil

khultā hai kab ye rāz-e-nihāñ dekhte raho

hai barg-e-gul ko bārish-e-miqrāz ke payām

tarz-e-tapāk-e-ahl-e-jahāñ dekhte raho

aa.ī nigār-e-ġham sadā 'hosh' ham chale

tum imtiyāz-e-sūd-o-ziyāñ dekhte raho

Top Urdushayar.com