kabhī aaheñ kabhī naale kabhī aañsū nikle
un se āġhāz-e-suḳhan ke ka.ī pahlū nikle
yuuñ bhī vo bazm-e-tasavvur se guzar jaate haiñ
jaise lai saaz se yā phuul se ḳhushbū nikle
hai is ummīd pe saiqal hunar-e-tesha-zanī
sīna-e-sañg se shāyad koī gul-rū nikle
qissa-e-dār-o-rasan hī sahī kuchh baat karo
kisī unvāñ se to zikr-e-qad-o-gesū nikle
ġham-e-daurāñ ne kiyā ahl-e-tamannā kā vo haal
dasht se jaise hirāsāñ koī aahū nikle
ham jinheñ 'hosh' tajāhul se ḳhatā samjhe the
nāvak-e-nāz vo sab dil meñ tarāzū nikle