shādāb-o-shagufta koī gulshan na milegā
dil ḳhushk rahā to kahīñ sāvan na milegā
tum pyaar kī sauġhāt liye ghar se to niklo
raste meñ tumheñ koī bhī dushman na milegā
ab guzrī huī umr ko āvāz na denā
ab dhuul meñ lipTā huā bachpan na milegā
sote haiñ bahut chain se vo jin ke gharoñ meñ
miTTī ke alāva koī bartan na milegā
ab naam nahīñ kaam kā qaa.el hai zamāna
ab naam kisī shaḳhs kā rāvan na milegā
chāho to mirī āñkhoñ ko ā.īna banā lo
dekho tumheñ aisā koī darpan na milegā