maiñ har be-jān harf-o-lafz ko goyā banātā huuñ
ki apne fan se patthar ko bhī ā.īna banātā huuñ
maiñ insāñ huuñ mirā rishta 'brāhīm' aur 'āzar' se
kabhī mandir kalīsā aur kabhī ka.aba banātā huuñ
mirī fitrat kisī kā bhī ta.āvun le nahīñ saktī
imārat apne ġham-ḳhāne kī maiñ tanhā banātā huuñ
na jaane kyuuñ adhūrī hī mujhe tasvīr jachtī hai
maiñ kāġhaz haath meñ lekar faqat chehra banātā huuñ
mirī ḳhvāhish kā koī ghar ḳhudā ma.alūm kab hogā
abhī to zehn ke parde pe bas naqsha banātā huuñ
maiñ apne saath rakhtā huuñ sadā aḳhlāq kā pāras
isī patthar se miTTī chhū ke maiñ sonā banātā huuñ