ab mujh ko dard sahne kī aadat nahīñ rahī
ye sach hai chaah se abhī chāhat nahīñ rahī
do-pal kā bhī sukūn mayassar nahīñ mujhe
taḌpā huuñ yuuñ ki chain kī hājat nahīñ rahī
dil se lagā ke yaad ko aajiz huā huuñ maiñ
ab terī yaad meñ vahī rāhat nahīñ rahī
shikve-shikāyateñ bhī karūñ kis se maiñ bhalā
jab ḳhud maiñ dekhne kī basārat nahīñ rahī
īmān-dārī se to vahī log duur haiñ
kahte haiñ jo yahāñ ki sadāqat nahīñ rahī
sab dukh tumhāre sah liye 'kāshif' ḳhushī ḳhushī
sahne kī aur mujh meñ to tāqat nahīñ rahī