hāl-e-dil apnā likhūñ haal tumhārā likkhūñ
tū hī batlā ki tire ḳhat meñ maiñ kyā kyā likkhūñ
un ko apnāne kī sab koshisheñ nākām huiiñ
bāzī-e-ishq meñ ab apne ko haarā likkhūñ
jis meñ tasvīr nazar aatī thī har vaqt tirī
aa.ina TuuT gayā ab vo tumhārā likkhūñ
gar garebāñ hī salāmat hai na dāman us kā
kaisī hālat meñ hai dīvāna tumhārā likkhūñ
'faiz' hālāt haiñ jo kuchh bhī karam hai us kā
kyuuñ na har haal ko ehsān tumhārā likkhūñ