miTne vaalī hasrateñ ījād kar letā huuñ maiñ
jab bhī chāhūñ ik jahāñ ābād kar letā huuñ maiñ
mujh ko in majbūriyoñ par bhī hai itnā iḳhtiyār
aah bhar letā huuñ maiñ fariyād kar letā huuñ maiñ
husn be-chāra to ho jaatā hai akasr mehrbāñ
phir use āmāda-e-be-dād kar letā huuñ maiñ
tū nahīñ kahtā magar dekh o vafā-nā-āshnā
apnī hastī kis qadar barbād kar letā huuñ maiñ
haañ ye vīrāna ye dil ye ārzūoñ kā mazār
tum kaho to phir ise ābād kar letā huuñ maiñ
jab koī taaza musībat TūTtī hai ai 'hafīz'
ek aadat hai ḳhudā ko yaad kar letā huuñ maiñ