ishq ne aql ko dīvāna banā rakkhā hai
zulf-e-anjām kī uljhan meñ phañsā rakkhā hai
uTh ke bālīñ se mire dafn kī tadbīr karo
nabz kyā dekhte ho nabz meñ kyā rakkhā hai
merī qismat ke navishte ko miTā de koī
mujh ko qismat ke navishte ne miTā rakkhā hai
aap betāb-e-numā.ish na kareñ jalvoñ ko
ham ne dīdār qayāmat pe uThā rakkhā hai
vo na aa.e na sahī maut to aa.egī 'hafīz'
sabr kar sabr tirā kaam huā rakkhā hai