āḳhir ek din shaad karoge
merā ghar ābād karoge
pyaar kī bāteñ vasl kī rāteñ
yaad karoge yaad karoge
kis dil se ābād kiyā thā
kis dil se barbād karoge
maiñ ne apnī qīmat kah dī
tum bhī kuchh irshād karoge
zar ke bando aql ke andho
tum kyā mujh ko shaad karoge
jab mujh ko chup lag jā.egī
phir tum bhī fariyād karoge
aur tumheñ aatā hī kyā hai
koī sitam ījād karoge
tañg aa kar ai banda-parvar
bande ko āzād karoge
mere dil meñ basne vaalo
tum mujh ko barbād karoge
husn ko rusvā kar ke marūñgā
āḳhir tum kyā yaad karoge
hashr ke din ummīd hai nāseh
tum merī imdād karoge