dāvar ne bande bandoñ ne dāvar banā diyā
sāgar ne qatre qatroñ ne sāgar banā diyā
betābiyoñ ne dil kī ba-ummīd-e-sharh-e-shauq
us jāñ-navāz ko bhī sitamgar banā diyā
pahlī sī lazzateñ nahīñ ab dard-e-ishq meñ
kyuuñ dil ko maiñ ne zulm kā ḳhūgar banā diyā
kaifiyat-e-shabāb se māzūr kuchh hue
kuchh āshiqoñ ne bhī unheñ ḳhud-sar banā diyā
'sehr' us nigāh-e-mast pe qurbān kyuuñ na ho
jis ke karam ne zinda qalandar banā diyā