dasht ke beach meñ tālāb nazar aate haiñ
ham ġharīboñ ko faqat ḳhvāb nazar aate haiñ
chāñdnī khul ke jo barse kabhī sahrāoñ meñ
ret ke zarre bhī mahtāb nazar aate haiñ
jhoñpaḌe vaale to sote hī nahīñ sāvan meñ
so.eñ to ḳhvāb meñ sailāb nazar aate haiñ
dil taḌap uThtā hai jab chāñd sitāre mujh ko
kaale tālāb meñ ġharqāb nazar aate haiñ
chand rāhat bhare lamhāt kī ḳhvāhish meñ 'obaid'
shahr vaale sabhī betāb nazar aate haiñ