ye ḳhalq jab talab-e-jāh meñ paḌī huī thī
to merī zaat tirī chaah meñ paḌī huī thī
tū apnī be-ḳhabarī meñ jahāñ se guzrā thā
ye merī umr vahīñ raah meñ paḌī huī thī
kahīñ bhī duur tak us kā koī nishān na thā
vo sirf merī talab-gāh meñ paḌī huī thī
maiñ lafz DhūñDhtā rahtā thā jis ke kahne ko
vo saarī baat mirī aah meñ paḌī huī thī
maiñ ḳhud ko lag rahā thā chaudhvīñ kī shab jaisā
ki merī jaan bhī ik maah meñ paḌī huī thī