mire hisse meñ jo aanī hai shohrat rok rakkhī hai
mire aḳhlāq ne bhī merī izzat rok rakkhī hai
hamāre pāltū tote ko billī kar ga.ī zaḳhmī
mire bachchoñ kī is ġham ne sharārat rok rakkhī hai
tumhārī yaad ne aise hameñ zinda rakhā ab tak
kisī ne jaise girne se imārat rok rakkhī hai
abhī rātoñ kī tanhā.ī meñ uTh kar rone vaale haiñ
isī baa.is mire rab ne qayāmat rok rakkhī hai
ka.ī din se nahīñ dekhā hai 'ashraf' maañ ke chehre ko
ka.ī din se in āñkhoñ ne ibādat rok rakkhī hai