agar tum dil hamārā le ke pachhtā.e to rahne do
na kaam aa.e to vāpas do jo kaam aa.e to rahne do
mirā rahnā tumhāre dar pe logoñ ko khaTaktā hai
agar kah do to uTh jā.ūñ jo rahm aa.e to rahne do
kahīñ aisā na karnā vasl kā va.ada to karte ho
ki tum ko phir koī kuchh aur samjhā.e to rahne do
dil apnā bechtā huuñ vājibī daam us ke do bose
jo qīmat do to lo qīmat na dī jaa.e to rahne do
dil-e-'muztar' kī betābī se dam uljhe to vāpas do
agar marzī bhī ho aur dil na ghabrā.e to rahne do