jab kahā tiir tirī aañkh ne akasr maarā

chitvaneñ pher ke bole ki barābar maarā

qadr kuchh bhī mire dil kī but-e-kāfir ne na kī

zulf-e-pechāñ se jo uljhā to mire sar maarā

jaan be-maut ḳhudā bhī nahīñ letā lekin

tū ne be-maut hī logoñ ko sitamgar maarā

chand zarre merī miTTī ke faqat haath aa.e

dasht-e-ġhurbat ke bagūloñ ne jo chakkar maarā

ik musalmān kā dil toḌ diyā kyā kahnā

apne nazdīk baḌā aap ne kāfar maarā

'muztar' aisā koī ab tak na ho aur na ho

maut ne haa.e abas dāġh-e-suḳhnavar maarā