tazkire fahm o ḳhirad ke to yahāñ hote haiñ
aql kī had se magar aage gumāñ hote haiñ
chhoḌ jaate haiñ kahīñ paas tire apnā vajūd
ghar pahuñch kar bhī to ham ghar meñ kahāñ hote haiñ
ḳhvāb o ummīd, gumāñ, us kā tasavvur, chāhat
talḳhī-e-zīst meñ ye rāhat-e-jāñ hote haiñ
kis tarah arz-guzārī se unheñ rokā hai
aise jazbe ki jo chhupte na ayaañ hote haiñ
ishq meñ tarz-e-takallum kī rivāyat hai ajab
kalma-e-ḳhās nigāhoñ se bayāñ hote haiñ
ḳhvāb jab jab hue zaḳhmī to hue sher na.e
varna ye mo.ajaze har roz kahāñ hote haiñ
sirf pindār-e-ḳhirad hī to nahīñ shaġhl-e-hayāt
mātam-e-ilm-o-amal bhī to yahāñ hote haiñ
saḳhtī-e-hashr se hoñge na kisī taur bhī kam
un ke ham-rāh vo lamhe jo girāñ hote haiñ
ātish-e-dil hai yā phir sozish-e-jāñ hai, kyā hai?
ek ik kar ke sabhī ḳhvāb dhuāñ hote haiñ
nasl-e-nau ke haiñ na.e shuġhl, na.ī hī tahzīb
bazm-e-imroz meñ azkār-e-butāñ hote haiñ
akasr auqāt tabāhī kā sabab huuñ, lekin
kuchh havādis bhī magar vaj.h-e-amāñ hote haiñ
umr bhar khul nahīñ paate haiñ rumūz-o-asrār
log kuchh sāmne rah kar bhī nihāñ hote haiñ
bārhā TuuT ke bhii, haiñ kahīñ maujūd abhī
valvale vo jo tire saath javāñ hote haiñ
ham ko to mil na sake, tum ko mile hoñge kahīñ
vo jo har haal meñ pāband-e-zabāñ hote haiñ
kyā kahā us ne, ye kyā kah ke pukārā 'ḳhālid'
aise kuchh jumle adā vaqt-e-azāñ hote haiñ