tham gayā dard ujālā huā tanhā.ī meñ

barq chamkī hai kahīñ raat kī gahrā.ī meñ

baaġh kā baaġh lahū rañg huā jaatā hai

vaqt masrūf hai kaisī chaman-ārā.ī meñ

shahr vīrān hue bahr bayābān hue

ḳhaak uḌtī hai dar o dasht kī pahnā.ī meñ

ek lamhe meñ bikhar jaatā hai tānā-bānā

aur phir umr guzar jaatī hai yakjā.ī meñ

us tamāshe meñ nahīñ dekhne vaalā koī

is tamāshe ko jo barpā hai tamāshā.ī meñ