lubhātā hai agarche husn-e-dariyā Dar rahā huuñ maiñ

sabab ye hai ki ik muddat kināre par rahā huuñ maiñ

ye jhoñke jin se dil meñ tāzgī āñkhoñ meñ ThanDak hai

inhī jhoñkoñ se murjhāyā huā shab bhar rahā huuñ maiñ

tire aane kā din hai tere raste meñ bichhāne ko

chamaktī dhuup meñ saa.e ikaTThe kar rahā huuñ maiñ

koī kamra hai jis ke taaq meñ ik sham.a jaltī hai

añdherī raat hai aur saañs lete Dar rahā huuñ maiñ

mujhe ma.alūm hai ahl-e-vafā par kyā guzartī hai

samajh kar soch kar tujh se mohabbat kar rahā huuñ maiñ