abhī ashkoñ meñ ḳhuuñ shāmil nahīñ hai
mohabbat kā junūñ kāmil nahīñ hai
zamāne se mohabbat kā abhī tak
ye hāsil hai ki kuchh hāsil nahīñ hai
na āñkheñ phoḌ is dasht-e-junūñ meñ
ye rāh-e-nāqa-e-mahmil nahīñ hai
zamīñ par baiTh jā ai shaiḳh tū bhī
ye bazm-e-mai tirī mahfil nahīñ hai
tabīboñ se kaho ghar lauT jaa.eñ
ye dard-e-dil vo dard-e-dil nahīñ hai
hamīñ 'aḳhlāq' us se be-ḳhabar haiñ
kisī pal ham se vo ġhāfil nahīñ hai