hamāre paas bhī dil hai ye aksar bolte haiñ
mohabbat kar ke phūloñ se ye patthar bolte haiñ
kisī ke hoñTh par hañstī haiñ phūloñ kī davā.eñ
kisī kī aañkh meñ chhup kar samundar bolte haiñ
kabhī jis meñ shahanshāhoñ huzūroñ ne hukūmat kī
unhī mahloñ ko saare log khañDar bolte haiñ
vahāñ par chuur ho jaate hai sab sapne taraqqī ke
jahāñ bachche buzurgoñ ke barābar bolte haiñ
nahīñ Dar hai jo aa kar sāmne se vaar kartā ho
yahāñ kuchh log aise haiñ jo hañs kar bolte haiñ