Duub kar aa rahā huuñ bhītar se
ek motī milā samundar se
chain kī saañs le sakūñgā ab
dushmanī ho ga.ī muqaddar se
ek aañsū kā bojh bhārī hai
buuñd se dariyā se samundar se
be-sabab ḳhuub muskurātā hai
tū bhī TuuTā huā hai andar se
dekhne meñ sitāre lagte ho
aap dhartī se haiñ yā ambar se
haq adaa.ī meñ haiñ lage donoñ
dard andar se zaḳhm bāhar se
aa.ine to yahāñ salāmat haiñ
phuul zaḳhmī hue haiñ patthar se