ik ḳhvāb ke asar meñ ka.ī din guzar ga.e
phir yuuñ huā ki aañkh khulī ham bikhar ga.e
jab paañv ke nishān nishānī kī tarah the
tab log kis Dagar pe chale aur kidhar ga.e
kal aañkh ke shajar se ka.ī phuul yaad ke
palkoñ se ho ke dil kī saḌak ḳhuub bhar ga.e
ai dukh tirī tavīl rifāqat ke ba.ad bhī
ḳhud se mile haiñ log to kitne nikhar ga.e
is baar phuul dhuup se nārāz the aziiz
sāya-farosh jitne bhī the be-hunar ga.e