vaise tum achchhī laḌkī ho
lekin merī kyā lagtī ho
maiñ apne dil kī kahtā huuñ
tum apne dil kī suntī ho
jhīloñ jaisī āñkhoñ vaalī
tum behad gahrī lagtī ho
mauj-e-badan meñ rañg haiñ itne
lagtā hai rañgoñ se bantī ho
phuul hue haiñ aise raushan
jaise in meñ tum hañstī ho
jañgal haiñ aur baaġh haiñ mujh meñ
tum in se miltī-jultī ho
yuuñ to bashar-zādī ho lekin
ḳhushbū jaisī kyuuñ lagtī ho
aksar sochtā rahtā huuñ maiñ
ḳhalvat meñ tum kyā kartī ho
vo qarya ābād hamesha
jis qarye meñ tum rahtī ho