har ek gaam pe ranj-e-safar uThāte hue
maiñ aa paḌā huuñ yahāñ tujh se duur jaate hue
ajiib aag thī jis ne mujhe faroġh diyā
ik intizār meñ rakkhe diye jalāte hue
tavīl raat se hotā hai barsar-e-paikār
so chaak tez huā hai mujhe banāte hue
ye tez-gāmi-e-sahrā alag mizāj kī hai
jo mujh se bhaag rahī hai qarīb aate hue
hai ek shor-e-guzishta mire ta.āqub meñ
maiñ sun rahā huuñ jise apne paar aate hue
sharīk-e-ātish o āb-o-havā o ḳhaak rahe
mire anāsir-e-tartīb shakl paate hue
bahut qarīb se guzrī hai vo navā-e-safed
mire havās kā niilā dhuāñ uḌāte hue
maiñ imtizāj-e-qadīm-o-jadīd huuñ 'kāmī'
so ism-e-asr hī paḌhnā mujhe bulāte hue