aur mahak thī jo us baaġh kī ghaas meñ thī
us ke paañv kī ḳhushbū bhī us baas meñ thī
tujh bārish ne tan phūloñ se bhar Daalā
ḳhālī shāḳh thī aur is rut kī aas meñ thī
tū ne aas dilā.ī mujh ko jiine kī
maiñ to sāñseñ letī miTTī yaas meñ thī
yaad to kar vo lamhe vo rāteñ vo din
maiñ bhī tere saath usī ban-bās meñ thī
har pal tere saath thī maiñ kab duur rahī
maiñ ḳhushbū thī aur tire ehsās meñ thī
bārish thī shab-bhar aur bhiig rahī thī maiñ
'jānāñ' kaisī shiddat merī pyaas meñ thī