ġham mujh se kisī taur sameTā nahīñ jaatā

pahrā hai mirī soch pe bolā nahīñ jaatā

ab dil ke dhaḌakne kī sadā bhī nahīñ aatī

aur qarya-e-ḳhvāhish se bhī niklā nahīñ jaatā

sajde ke nishānoñ se jabīñ zaḳhm huī hai

aur tujh se muqaddar mirā badlā nahīñ jaatā

sūraj ke nikalne kī ḳhabar mujh ko bhī karnā

zulmat-kada-e-shab meñ to Thahrā nahīñ jaatā

āñkhoñ meñ chhupe ḳhvāb bhī chhin jaa.eñ na mujh se

is ḳhauf se rauzan koī kholā nahīñ jaatā

har roz nasheman pe mire girtī hai bijlī

ghar mujh se nayā roz banāyā nahīñ jaatā

ham apnī anāoñ kā bharam rakhte haiñ 'shahnāz'

har baat pe tūfān uThāyā nahīñ jaatā