koī bhī lafz-e-ibrat-āshnā maiñ paḌh nahīñ saktā
basīrat ko na-jāne kyā huā maiñ paḌh nahīñ saktā
samundar ne havā ke naam ik ḳhat reg-e-sāhil par
kisī murda zabāñ meñ likh diyā maiñ paḌh nahīñ saktā
ye insānoñ ke māthe to nahīñ katbe haiñ qabroñ ke
har ik chehre pe us kā marsiya maiñ paḌh nahīñ saktā
zamīn o āsmāñ sūraj sitāre chāñd sayyāre
kitāb-e-dā.era-dar-dā.era maiñ paḌh nahīñ saktā