soḳhta kashtī kā malba maiñ mirā dil aur shaam
ġham-zada utre hue dariyā kā sāhil aur shaam
raat ke ik pesh-ras taare kī dhaḌkan tez tez
aañkh meñ sahme hue ḳhvāboñ kī jhilmil aur shaam
ḳhastagī se chuur paañv hasrat-e-vāmāñdgī
kohr meñ Duubī huī mauhūm manzil aur shaam
āshiyāñ meñ muntazir bachchoñ kā karb-afzā ḳhayāl
rishta barpā tā.eroñ kā raqs-e-bismil aur shaam
maiñ ye kāġhaz aur ashk-ālūd sheroñ kā nuzūl
ek vaadī ek chashme kī taral-ril aur shaam