ehsās-e-āshiqī ne begāna kar diyā hai

yuuñ bhī kisī ne aksar dīvāna kar diyā hai

ab kyā umiid rakkhūñ ai husn-e-yār tujh se

tū ne to muskurā kar dīvāna kar diyā hai

tujh se ḳhudā hī samjhe tū ne kisī ko ai dil

mujh se bhī kuchh ziyāda dīvāna kar diyā hai

phir us ke dekhne ko āñkheñ taras rahī haiñ

yādash ba-ḳhair jis ne dīvāna kar diyā hai

mujh ko junūñ se apne shikva jo hai to ye hai

merī mohabbatoñ ko afsāna kar diyā hai

ai husn-e-roz afzūñ umrat darāz baad

donoñ jahāñ se mujh ko begāna kar diyā hai

jab dil meñ aa gayā hai ik jumbish-e-nazar ne

dīvāna kah diyā dīvāna kar diyā hai

mujh se hī pūchhte haiñ ye shoḳhiyāñ to dekho

mere 'jigar' ko kis ne dīvāna kar diyā hai