kyā kashish husn-e-be-panāh meñ hai
jo qadam hai usī kī raah meñ hai
mai-kade meñ na ḳhānqāh meñ hai
jo tajallī dil-e-tabāh meñ hai
haa.e vo rāz-e-ġham ki jo ab tak
tere dil meñ mirī nigāh meñ hai
ishq meñ kaisī manzil-e-maqsūd
vo bhī ik gard hai jo raah meñ hai
maiñ jahāñ huuñ tire ḳhayāl meñ huuñ
tū jahāñ hai mirī nigāh meñ hai
husn ko bhī kahāñ nasīb 'jigar'
vo jo ik shai mirī nigāh meñ hai