aaj ro kar to dikhā.e koī aisā ronā
yaad kar ai dil-e-ḳhāmosh vo apnā ronā
raqs karnā kabhī ḳhvāboñ ke shabistānoñ meñ
kabhī yādoñ ke sutūnoñ se lipaTnā ronā
tujh se sīkhe koī rone kā salīqa ai abr
kahīñ qatra na girānā kahīñ dariyā ronā
rasm-e-duniyā bhī vahī rāh-e-tamannā bhī vahī
vahī mil baiTh ke hañsnā vahī tanhā ronā
ye tirā taur samajh meñ nahīñ aayā 'mushtāq'
kabhī hañste chale jaanā kabhī itnā ronā