haath lahrātā rahā vo baiTh kar khiḌkī ke saath

maiñ akelā duur tak bhāgā gayā gaaḌī ke saath

ho gayā hai ye makāñ ḳhālī sadāoñ se magar

zehn ab tak gūñjtā hai rail kī siiTī ke saath

muddateñ jis ko lagī thiiñ mere paas aate hue

ho gayā mujh se judā vo kis qadar tezī ke saath

koī bādal mere tapte jism par barsā nahīñ

jal rahā huuñ jaane kab se jism kī garmī ke saath

niind katrā ke guzar jaatī hai āñkhoñ se 'nasīm'

jāgtā rahtā huuñ ab maiñ shab kī vīrānī ke saath