jilā-vatan huuñ mirā ghar pukārtā hai mujhe

udaas naam khulā dar pukārtā hai mujhe

kisī kī chaap musalsal sunā.ī detī hai

safar meñ koī barābar pukārtā hai mujhe

sadaf huuñ lahreñ dar-e-jism khaTkhaTātī haiñ

kanār-e-āb vo gauhar pukārtā hai mujhe

har ek moḌ mire paañv se lipaTtā hai

har ek miil kā patthar pukārtā hai mujhe

phañsā huā hai mire haath kī lakīroñ meñ

mirā humā-e-mqaddar pukārtā hai mujhe

na jaane kyā thā ki maiñ dūriyoñ meñ kho aayā

vo apne paas bulā kar pukārtā hai mujhe

chalī hai shām-e-shafaq-rañg bādbāñ le kar

dabīz shab kā samundar pukārtā hai mujhe

paroñ kā bojh jhaTak kar maiñ uḌ gayā huuñ 'nasīm'

zamīn par mirā paikar pukārtā hai mujhe