vo milā mujh ko na jaane ḳhol kaisā oḌh kar
raushnī gum ho ga.ī apnā hī saayā oḌh kar
niiñd se bojh haiñ patte ūñghte se peḌ haiñ
shahar soyā hai ḳhamoshī kā labāda oḌh kar
DhūñDhtā phirtā thā maiñ har shaḳhs ke aslī nuqūsh
log milte the mujhe chehre pe chehrā oḌh kar
munjamid sā ho gayā huuñ ḳhunkī-e-ehsās se
dhuup bhī niklī hai lekin tan pe kapḌā oḌh kar
rañg saare dho gayā hai raat kā bādal 'nasīm'
aur ghar nañge hue paanī barastā oḌh kar