na maiñ dariyā na mujh meñ zo.am koī be-karānī kā

ki maiñ huuñ bulbule kī shakl meñ ehsās paanī kā

mohabbat meñ tirī apnī zabāñ ko sī liyā maiñ ne

asar zaa.il na ho jaa.e tirī jādū-bayānī kā

ajab kyā hai jo merī dāstān-e-ḳhūñ-chakāñ se bhī

koī pahlū nikal aa.e kisī kī shādmānī kā

maiñ apne paañv kī zanjīr ik din ḳhud hī kāTūñgā

hadaf banñā nahīñ mujh ko kisī kī mehrbānī kā

tumhāre sāmne aa.uuñ tumheñ apnī safā.ī duuñ

sabab ma.alūm ho tab nā tumhārī bad-gumānī kā

mirā siina hazāroñ chīḳhtī rūhoñ kā maskan hai

vasīla huuñ maiñ gūñgī hasratoñ kī tarjumānī kā

hamārā ahd bhī likkhe alif-lailā ke jaisā kuchh

badalnā chāhiye ab rañg kuchh qissa-kahānī kā

nahīñ tere liye ye do minute kī chup nahīñ kaafī

tirā ġham mustahiq hai umr bhī kī nauha-ḳhvānī kā

mirī tā.īd meñ bhī ab kisī kā hoñT to kāñpe

koī to dard bāñTe aa.e merī be-zabānī kā