balā se koī kahe din ko raat chup rahnā
tum apne hoñToñ pe rakh lenā haat chup rahnā
kahīñ pe kuchh bhī nazar aa.e pūchhnā mat kuchh
kabhī nikalnā agar mere saath chup rahnā
ḳhudā ne baḳhshā hai kyā zarf mom-battī ko
pighalte rahnā magar saarī raat chup rahnā
tumhāre sar pe bagūle bhī aa ke chīḳheñge
magar bhulānā nahīñ merī baat chup rahnā
tumhārī chīḳh tumheñ be-panāh kar degī
shikārī kab se lagā.e hai ghaat chup rahnā
zabān taalū meñ paivast kar ke rakhnā 'talab'
koī mazāq hai kyā tā-hayāt chup rahnā