na shahr meñ na kisī dasht-e-hū meñ ḳhaak hue
hamāre ḳhvāb hamāre lahū meñ ḳhaak hue
kisī ke haath lagā kab vo māhtāb-badan
ka.ī jiyāle vahīñ justujū meñ ḳhaak hue
dhuāñ sā uThtā hai dil se jo sochtā huuñ kabhī
vo kaun the jo mirī aarzū meñ ḳhaak hue
the kitne giit jo āvāz ko taraste rahe
hazār raag rag-e-ḳhush-gulū meñ ḳhaak hue
ab is se achchhā-bhalā iḳhtitām kyā hotā
uThe the maiñ se magar jā ke tū meñ ḳhaak hue