ravāñ hai nuur kā ik sail har-bun-e-mū se
mujhe chhuā hai kisī ne hazār pahlū se
badal ke rakh diyā jañgal ko shahr meñ us ne
tamām dasht pareshāñ hai ek aahū se
ḳhudā ke vāste ab rok bhī ye raqs-e-junūñ
sadā kuchh aur hī aane lagī hai ghuñghrū se
unheñ maiñ vaqt ke kāñdhe pe Daal detā huuñ
jo bojh uThte nahīñ mere dast o baazū se
har ek ahd ne likkhā hai apnā nāma-e-shauq
kisī ne ḳhuuñ se likhā hai kisī ne aañsū se
mirā savāl ġhazal ke muḳhālifīn se hai
mujhe nikal ke dikhā deñ ġhazal ke jaadū se