jis ko dekho vahī paikār meñ uljhā huā hai

har garebān kisī taar meñ uljhā huā hai

dasht bechain hai vahshat kī pazīrā.ī ko

dil-e-vahshī dar-o-dīvār meñ uljhā huā hai

jañg dastak liye aa pahuñchī hai darvāze tak

shāhzāda lab-o-ruḳhsār meñ uljhā huā hai

ik hikāyat lab-e-iz.hār pe hai soḳhta-jāñ

ek qissa abhī kirdār meñ uljhā huā hai

sar kī qīmat mujhe ma.alūm nahīñ hai lekin

āsmāñ tak mirī dastār meñ uljhā huā hai

aa.iye biich kī dīvār girā dete haiñ

kab se ik mas.ala be-kār meñ uljhā huā hai