ham na hañste haiñ aur na rote haiñ

umr hairat meñ apnī khote haiñ

khā ke ġham ḳhvān-e-ishq ke mehmān

haath ḳhūn-e-jigar se dhote haiñ

vasl hotā hai jin ko duniyā meñ

yārab aise bhī log hote haiñ

kos-e-rahlat hai jumbish-e-har-dam

aah tis par bhī yaar sote haiñ

dil lagā us se mardum-e-dīda

saath apne hameñ Dubote haiñ

āh-o-nāla se vo ḳhafā hai abas

kāñTe ham apne haq meñ buute haiñ

yaad aatī haiñ us kī jab bāteñ

dil 'hasan' donoñ mil ke rote haiñ